分享澳洲语言礼貌、出发前开银行户口+出电话卡、本地生活

语言礼貌

语言

语言就唔驶多讲, 系以英文为主, 一般来讲英文以外既语言系唔需要既, 除非你系专门做翻译之类, 不过其实系好少, 因为本地人既思维系, 觉得你来得就应该要识英文, 所以又好少专登去学你个语言来为左做你生意(虽然开始有多左大企业想做亚洲人生意, 但普遍来讲呢个想法未系非常普及),所以就算系我来既时候, 系市中心既information柜位, 的人都系讲英文既, 岩岩来既时候当然系听到一头雾水啦, 因为唔止系渠地个口音, 而且渠地用既字严格来讲唔系英文, 系字典上唔会出现既俗语, 好似你同我讲既广东话俗语咁, 字典都系搵唔到的.

对话小贴示: 例如渠地会将australian 讲成aussie, mosquito讲成mossie, barbecue - barbie. 如果你听得明渠的口音而又唔知点解渠地会无啦啦讨论食乜既时候讲到barbie公仔, 其实渠地好可能系讲紧bbq啦. 呢种俗语大概系我地广东话里面既着牛记笠记去茶记咁啦, 你知渠讲咩就会知, 唔明即管问啦, 岩岩来到唔识渠地的俗语其实好正常既. 如果你地想睇定多的常用俗语可以去youtube, 仲有声有画添, 可以容易的习惯口音同俗语.

礼貌

首先, 麻烦各位中意听歌既朋友, 唔好去到边都将你的歌播出黎, 尤其系公众地方例如公园或者草地或者海滩, 唔知点解我见好多香港人都系咁, 好嘈. 要听麻烦自己戴耳塞听, 就算你成班朋友中意听都唔等于途人都中意听. 系地铁都唔好咁, 亦唔好见到本地人系咁你都系咁. 唔好大大声讲电话, 因为本地人咁其实都已经好乞人憎, 通常的人唔敢话渠地遮, 有时会有人话渠的, 俾人话你就唔好啦, 外来人咁做会更乞人憎. 唔该 .

讲多几句thank you或者sorry唔会死人, 落巴士thank司机都唔会死人, 入到铺头人地同你say hi或者how're you doing唔好好似系香港人地同你讲欢迎光临咁直行直过, 你hi番佢唔会死人. 当你一行入铺头渠就同你讲一大串野你又唔知渠讲乜, 多数系同你say个hi, 问有无野可以帮到你,你可以讲hi, how're you doing, i'm just looking. 呢两句应该解答晒渠可以问你既问题. 走既时候可以讲句thank you 拜拜都唔会死人, 特别如果个职员有帮你.

礼貌系好重要既, 而微笑可以避免好多误会, 我初来澳洲果时, 其实基本上90%既野都听唔到, 主要因为的人既口音同俗语, 但讲系好正常的, 起码你学左咁多年​​既英文, 你讲其实渠地系听得明架, 你听唔到时只要讲sorry my english is not very good, could you speak more slowly please? 然后加个非常友善既笑容, 然后渠地就会讲慢好多或者净系讲keyword而且唔讲俗语版, 咁应该唔太难听. 重点系好多人包括我自己初来果阵, 因为听唔明, 自己会tune out左, 然后系个饭台度人地同你讲野会以为渠地同紧自己的朋友讲野, 人地问我野无反应之余仲会人地讲讲下行左去添... XD 千祈唔好学我咁. 注意有时人地同你讲野可能未必睥实你, 而系同其他同台既朋友讲讲下其他野​​讲起你尝试将你融入渠地个对话里面, 或者系架车度车埋你时不停咁讲野, 介绍下风景或者文化等, 千祈唔好因为有其他人系架车度就自动以为渠地唔系同你讲野, 紧记听唔明出声, 微笑 .
慢慢你就会听到越来越多, 然后你就会发现渠地既英文根本唔系英文.

对话小贴示:
如果人地问你 do you want some abcxyz?
你唔要既话可以微笑地讲i'm good, thank you
你要既话可以礼貌地讲yes, please. (please系好似我地广东话讲"要丫唔该"既"唔该"咁, 不过系你想要件野又未到手既时候讲既, 而且就咁讲YES或者OK好似奉旨咁, 有时如果你唔笑睇落就会更加无礼貌)
然后你拎到件野之后先至讲thank you (thank you 系拎到件野之后先讲既)
如果你话唔要, 有时人地会礼貌问多你一次are you sure? 咁你可以考虑完一轮之后再答渠.

以上系我岩岩来既时候一个本地市区农夫教我既, 其实就算你讲yes thank you 都唔会有人话你, 最紧要你成个态度表现出有礼貌就得, 好少会有人怪你英文唔好的, 我岩岩来的时候听唔到90%, 微笑只不过找少好多麻烦咁解唧.

另外如果你系party或者同朋友食饭既时候, 一般本地人来讲, 如果系人地屋企bbq, 主人家通常会提供肠仔同面包, 一般系你自己带野饮(除非主人家特别讲明渠会提供啤酒), 唔好自己走去拎晒人地的酒来饮, 因为呢度的酒系离奇咁贵, 所以一般去人地屋企bbq party系自己带自己酒. 如果系新识你又想有个好印象, 可以买支香槟或者白酒或者半打啤酒去俾主人家, 香槟来讲十零蚊有交易, 白酒较普遍, 十蚊楼下都有, 半打啤酒最贵. 唔系必要的, 唔系人人带, 但礼多人不怪, 睇你有几多钱系身. 有时主人家见你无带野饮或者唔知要带野饮都会问你要唔要, 如果唔熟果的我一般都会唔要既, 因为有时人地只系礼貌上问下, 唔系真系想俾你, 但澳洲人比香港人坦诚, 如果唔想俾你都未必会问你,当然都睇果个人有几坦诚几有礼貌或者你同渠有几熟啦, 如果你真系想饮就讲声thank you啦, 尽量唔好豪劈人地的酒, 如果你好快饮晒人地又再问, 你又想饮又想懒有礼貌, 可以用我呢招, 就系扮晒野咁问下你会唔会饮晒渠的啤酒架, 咁佢梗系话梗系唔会啦唔好客气, 咁你又有多支啤酒喇~ 我估佢唔会因为你饮左渠一两支啤酒而憎你一世既~ 记住多谢人呀!~

工作

你想睇本地人对工作既讨论可以去whirlpool forums, 拣non-IT果部份.

农工

其实正常本地人都唔会做农工既(当然你要搵就点都有既, 不过"一般来讲"无咁解遮), 一般都系背包客先会做. 不过本地系有农业相关既学位可以读, 内容大概系围绕气候、生化同工程.

有朋友系西南部manjimup有酒庄, 佢话其实每到入樽季节都会唔够人, 都系请backpacker, 工作都系将酒入樽, 应该系最舒服同高薪既农工, 因为系室内既,而且佢唔会俾的酒热亲, 所以应该会有冷气, 坐系度入, 可唔可以边入边饮就唔知啦~

因为本人其实无做过农工, 我所知既都系呢度本地人以本地人既身份话我知的(例如酒庄主人同酿酒师, 或者牧场主人), 部分系真系来backpack的朋友,所以可能有其他人可以分享以backpacker角度出发既资料, 我只系分享到以本人地角度出发的.
好多白人既白工都系白人先搵到, 点解呢? 系渠道, 一般澳洲人搵野都系用google, 无人会用yahoo或者其他野的, 而渠地search野都会打英文, 所以渠地去搵backpacker去帮渠地做野, 都会用英文search backpacker 资料, 以forum为例, 只系识英文既奥洲雇主就唔会搵到呢个forum喇, 咁咪搵唔到你啰, 所以渠等人用时你又搵唔到工就咁解.

instead of 背包客栈, 你试下search "backpacking in australia" 等, 你会发现呢个地球唔系净系得华人会来澳洲backpack的. (我无search过, 只系举例)

尝试多的用渠地既角度睇下渠地点搵人, 你就会知点搵工. 农工市区工都系一样.

市区工

本人一直做既都系市区工, 市区工多数都系上seek搵既, 系www.seek.com.au, 系本地最大既求职网站, 你可以拣番你所属既地区, 分行业分职业咁搵, 同香港的求职网基本上都系一样的. 以下既经验同分享, 有好大部份都系点样搵一份安安份份留系一个地方既工, 如果你谂住周围走或者环岛游, 你未必需要睇.

一般来讲, 如果你行入一间野, 见好多本地白人, 通常薪酬都唔太差而且唔会太辛苦, 睇里面既人似唔似系smart既人定系小学都未毕业你就会大概估到渠地要求既程度去到边. 所以你见就算同样系零售店, 卖真珠宝既店员其实睇落去系smart过卖珠义盛既店员.

如果你见间店有好多华人, 一般来讲都唔会太高薪, 而且要求你做多好多野, 黑工定白工就一间间而定, 如果你想以表面观察, 就睇下的人有几smart啦, 其实呢一点都可以标示到好多野.

大型连锁公司请人一般系网上申请, 所以你就咁行入间铺系无用的, 渠都会叫你番屋企上网申请, 特许经营店除外. 超市收银员其实要求唔高, 你识唔识讲英文都唔太紧要, 不过重点系你要系永久司民(permanent resident/PR), 因为上网申请, 如果你剔个格仔唔系本地人, 相信你都过唔到果一页, 如果你夹硬剔话自己系本地人, 渠又check唔check你身份我唔敢讲每间公司都一样, 但我相信如果你讲野谈吐唔似本地人, 甚至唔似系来读书既话, 其实讲两三句已经知或者你未讲野都已经知, 好难呃到人.

麦当奴同kfc呢的其实我唔太清楚, 眼见唔到太多华人做, 可能因为节奏太快, 如果你英文唔够好其实你做唔来, 表面上好似好容易系香港做到既工作, 其实系呢度未必太容易. 因为drive through位好似话系7秒钟咁上下要完成好个order. 就算你唔系做落单位, 你煮食位或者pack埋个餐既位一样要听得明渠的英文, 而且真系节奏好快, 唔会有人愿意请个人返来系咁赶既环境下仲要样样慢慢讲repeat几次. 有无唔驶对客位就唔知啦, 大家可以试下, 有时的铺好等人用可能乜人都会请.

边一的公司你可以试呢? 以下有的建议, 不过呢的公司都唔会想请个人来做三几个月就走, 所以如果你系打算环岛游或者走来走去的话, 劝你唔好浪费时间而且引地本地人注意有多左backpacker来搵长工然后做几个月又走, 因为你只系激嬲人, 然后以后来想搵长工既人都会有个难左既起点. 麻烦各位自律.

IGA超市- 其实系特许经营来的, 唔系一个老板控制晒咁多间, 所以请人唔系中央统一控制, 你可以逐间问, 一间个老板唔请可能第间请, 而且有好多iga老板本身系华人, 呢的未必会上网登, 通常系门口贴张纸, 有时可能想请人但未贴得切, 所以无贴纸你都可以行入去问, 问下唔驶死.

Telstra - 唔讲你唔知, 本地人都唔知, telstra系有本店同特许经营店的, 本店都系只请永久居民, 特许经营店就唔一定而且唔经中央请, 边间系特许经营店就上网应该睇到, 或者渠铺头门口果的宣传杂志有写的, 渠有个位系写边度有分店, 打左*果的就系特许经营. 你识电话科技一定有着数, 唔识都唔紧要, 只要你唔好做几个月走就得, 个system好很复杂(而家有无进步左唔知啦), train你都要几个月, 识英文系基本, 唔驶去到莎士比亚级但系唔好太差, 一般要同客人沟通到. 系seek搵. 如果你做得好有些会问你要唔要工作签证留低的, 但唔系间间会.

一般商场零售店/coffee shop - 呢的零售业尤其饮食业的员工来得快走得仲快, 经常缺人, 睇你个位对唔对客人, 如果你唔驶对客, 唔识英文未必唔请.

搵工小贴示:

重点系如果你想搵份唔太短的工, 你唔可以太似外来人尤其系backpacker, 否则都好难会请. 言行举止要有咁正常得咁正常, 我谂大家有时系行见到有的人, 未讲野都一睇就知渠系香港人, 或者大陆人, 或者日本人, 呢的都系衣着言行举止, 我地睇到有分别, 人地都睇到的.

如果你去商场洗铺搵工, 着得正经少少, 唔好好似出去行街顺便搵工咁, 否则人地会觉得你无诚意同埋唔似本地人, 因为一般本地人都唔会咁做的, 除非你系十四岁去搵份麦当劳工.

一般零售业既工作都系黑衫黑裤黑鞋, 系香港唔需要呢种dress code既工作有好多系呢度都要, 例如剪发、餐饮食或者时装店等等, 就算无讲明, 一般都系全黑, 有时白恤衫, 但黑裤黑鞋系正路, 而且有好多工的黑裤唔可以系黑牛仔裤, 要系business pants. 如果你无呢的野, 呢边kmart, bigw, target都有, target最贵, 其次bigw, 最平系kmart但未必有咁齐. 一般返工需要既服装你都可以系果度买到而且好平, 正常既色会有, 码都好齐, 平过香港添, 的物料系正常出街grade, 但你唔好期望的西装系好靓料啦~ 不过绝对着得返一般零售工无问题.

另外你最好印定份cv, 有联络电话的, 唔好摆香港个电话落去, 唔会打俾你之余, 一睇就知你​​岩岩来而且好新.

如果你谂住搵份唔太短既工, 唔好写你系working holiday visa, 唔好提, 到你有得见工人地问你先好讲, 唔问唔好讲. 一般来讲, 如果你想搵份长工, 谂下你系香港有咩唔会写落cv, 呢度其实都系一样.

唔好写得太好, 如果你系香港做会计或者律师之类, 来到搵份麦当奴工, 你系唔会搵到的, 除非你写得好动人, 说服到人点解你会做做下律师来做麦当奴, 否则一般人都会笑完之后掉左你份CV.

唔好写得太复习, 同香港一样, 你要有准备有时你份CV唔系经理或者老板睇, 只系个老板或者经理叫个秘书去睇, 可能叫渠睇下有无边一的相关既keyword, 如果个秘书睇唔到, 就会当你无, 咁你就无左份工得好无辜喇.

你既工作经验唔好写"work experience", 你可以用"job history", 因为呢度有好多中学以上既学校例如大学或者tafe都会有个必修既无薪实习, 就系叫work experience. 你写work experience一般人一睇都会系谂起呢种无薪实习, 如果你份cv全部都系无薪既work experience, 人地一系会以为你岩岩毕业无真正出来做过野, 或者知道你系岩岩来而且好新.

到最后如果你有份工真系好想做而且觉得有投资价值你可以自荐无薪工作, 通常系一星期两三日而且唔系全日. 如果你唔系纯粹为钱而真系好想做份工(例如我知有的人真系好想学冲咖啡, 学酿酒等), 或者你觉得渠会俾工作签证你留低, 但一般麦当劳工作就唔会有人咁做啦.


出发前开银行户口+电话卡

电话

呢度既电话任何plan或者储值卡都系打电话者俾钱的, 收电话者讲几耐都唔驶钱. 你可以开张零credit既电话卡, 你打唔到俾人, 但人地打到俾你的.

一个本地电话号码系好有用的, 你可以写定你份CV印定出黎, 唔驶来到再买卡又等渠activate然后打番落CV然后又再搵地方俾钱印, 呢个系朋友经历. 你甚至可以搵定某些工, 搵地方住, 同埋出发前俾定你屋企人, 总之你会一到步就有个本地电话号码系方便好多的. 唔知你本身电话打唔打到长途, 但柏斯呢边好多野都唔方便而且真系可以四野无人, 唔好谂住周围有人俾你问野, 唔好谂住周围有电话亭, 唔好谂住机场就乜都有唔好谂住24小时, 呢度个机场落后过泰国. 你想话问下公共交通既话一般本地人都系唔知的, 因为一般人都系自己渣车. 你有电话既话睇下系唔系3G, 2G既话基本上接收系好差的, 3G系OK, 如果你系香港买到next G 电话的话系收得最好的(但我谂买唔到), 呢度好多地方就算市区3G都系收得好差的, 要用next g先得, 尤其如果你会住既屋系金属屋顶或者系郊区都好大机会会收得差, 另外无车系真系唔方便的.

电话卡你可以搵你已经到左既朋友买, 如果你无朋友, 可以私下搵我, 我唔会日日去但可以出开去的时候帮你买, 请预留多少少时间同埋话我知你几时到步或者几时要, 电话卡费同邮费当然系客下自己俾番, 我顺路的可以帮你买telstra或者optus, 如果你真系想要vodafone都可以帮你买既, vodafone同3已经合并左做同一间公司, telstra收得最好, 如果你住得僻甚至去做农工, 一般都要telstra先收到, 一好多地方连telstra都收唔到要用卫星电话, 如果你想知你将会去既地方电话讯号, 你可以去www.telstra.com.au, 系佢个search栏度打"coverage map", 输入你去既地方名或者post code, 渠就会有个地图出黎, 你对番个颜色, 渠就会显示俾你睇, 系一般3G收到, 定系next g收到, 定系连next g都收唔到要用卫星(卫星先收到其实无办法).

呢度基本上间间电话公司都系贵而且服务唔好, 行入间铺唔好旨意渠用刘德华咁既服务态度对你, 系绝对唔会的. 如果你谂住上台开个新number渠会态度好一阵, 如果你只系要prepaid(预付)佢唔会好热情的(如果佢好热情一系你好好彩, 一系你好靓女), 如果你唔系永久居民一般来讲你上唔到台, 都系要用prepaid.

如果你本身个电话收得唔好, 你可以行入telstra然后买有个蓝剔logo既电话, 系郊区接收认可, 收得特别好的, 有平有贵, 但通常唔会系smart phone, 一般全球有卖既抢手smart phone都唔系为郊区接收而设的, 所以唔会收得特别好, iphone一般来讲系接收得最好既smart phone. 你想知多的可以上www.telstra.com. au自己睇, 拣Prepaid, 然后拣phone或者handset(部手机). 注意prepaid既telstra电话通常系locked to to telstra的, 即系你日后如果想入张vodafone或者optus电话卡落去, 要另外俾钱unlock左先得. 但如果你买来都系为左有telstra接收力而电话又唔太贵的话无所谓啦. 同样都唔好谂住行晒咁多间电话公司买部最平的机然后去另一间买张最平的卡, 因为prepaid机通常系lock的, 上台机就唔会lock因为你上得台渠都同你签左约.

如果你想睇一部机收唔收到next G, 你可以睇下部机既网站或者个盒, 睇佢收唔收到850频, 850系next G. 如果你系间店度搵唔到而你要买既电话又相对贵的话, 我会上网做左资料搜集先, 唔会话求其行入间野睇下边部个样靓就执渠番屋企. 如果你想睇多的电话technical info可以去www.gsmarena .com, 一般都会有频率资讯既. (题外话4G都出左喇不过未普偏, 科技真系日新月异..)

费用:

邮费: 澳洲去香港, 信封size $1.65, 如果你赶要就当然自己加钱啦, 详情自己睇www.auspost.com.au

电话卡费(telstra):

$2 - $0 无钱的, 只系要个电话号码, 无钱唔可以打出但可以收电话, 你可以差唔多出发先自己用credit card增值, 唔驶出街的, 但你用开一张credit card要用番同一张, 否则要再登记的. 或者你可以来到既时候先去超市油站等买增值券, 我自己系用credit card ge. 如果你想到步前开张本地银行卡下面会再讲.
$20 - 有$20 值
$30 - 有 $2xx - $3xx 值

所以我一般都系用$30, 抵好多, $20唔够用, 尤其你岩岩到, 好多电话要打, $30又用唔晒, 一般每个月我都有半个钟以上可以打长途返香港.

一般都包上网.

optus 同vodafone唔清楚, 大家可以上渠地网站自己睇. 本人系用telstra既.

银行开户

又好多人唔知, 其实你可以到步前开户既, 据我所以hsbc系唔得既, 而且hsbc系呢度唔系主流银行, 系柏斯既分行系少到离奇, 一般人好少用既,但当然有的野系hsbc先做到, 有的野都系hsbc较平, 但都有较贵, 如果你有咩特别可以再私下问我. 或睇佢个网站www.hsbc.com.au

呢度一般银行户口都要俾月费既, 少量唔驶, 唔驶月费既通常系储蓄户口, 拎钱出黎要再过户番去transaction 户口, 或者你要每个月入钱落去(例如出粮)咁就会免月费.

以我所知主要可以开户又唔太烦又唔太贵既系westpac, 利申本人系做westpac既, 有种户口系俾移民用, 你唔驶一定要移民来, 渠主要系俾未到步既人开左个户口先, 咁你唔驶袋住堆cash穿州过省, 我唔知你地带几多钱过来, 但我来果时就带左唔系好多所以更加唔想唔见既现金,经马来西亚再经星加坡咁训左一晚机场先来到既... 现金系袋住上机落机同系机同训. 如果我当时知道可以未到步先开户口我一定会用.

费用来讲一般系transaction户口$5一个月(但你每月有二千蚊入落去就免费), 无利息, 储蓄户口唔驶月费, 利息介乎2.x% - 4.x%, 浮动息率, 不时会变. 你中意仲可以做7日至几个月既定期, 利息当然好过香港好多啦.

如果你未到步或者到步无耐, 可以用移民身份来开户, 咁头一年既月费就会免晒. 注意你并唔需要真系移民的, 只要你未到澳洲或者到左无耐就可以.

然后你可以有张提款卡但系系master card来既, 你可以当一般信用卡咁全球只要收master card既地方都用到, 当然澳洲以外提款就有另外收费啦. 同埋渠系debit master card, 唔系credit card, 所以你只可以用你户口里面有既钱, 唔可以亦唔会欠数的.

如果你唔谂住摆钱落去其实唔驶开定, 来到先开都得.
保险

保险系香港买左先过来, 一来较平, 二来一般都系全球通用, 三来如果你买既保险系保埋flight delay 或者失物既话即系你来果程都受保, 尤其系转机, 朋友来既时候就行李寄失左, 几日后先寄番过来, 不过渠份保险唔保, 所以大家睇清楚.

我来果时系无working holiday保既, 我要医疗人寿逐张单分开咁买, 而且保唔到行李航班等(呢的系旅游保先有), 如果你有working holiday应该好D, 因为即系你来工作都会朋保, 否则你买旅游保然后来到工作期间受伤可能无得赔或者问你好多野.

呢度睇医生好贵, 一般睇次伤风感冒好似系$8x, 本地人好似系$6x, 唔记得, 好耐无病, 但岩岩到无耐就大感冒唔睇唔得, 仲要医药分家,所以药费系再on top 个诊金, 如果你有买保险而又受, 睇一两次医生都差唔多, 不过睇清楚你份保险赔乜先好买, 一般非working holiday既医疗保险系唔会赔伤风感冒的, 只会赔入院类, 旅游保可能会赔但可能有垫底费. 自己睇清楚. 我来果时系无wh保的所以唔太清楚, 无野可以推介你.

如果你想来到先买系可以, 而且仲可以扣税, 不过价钱比香港高少少, 但赔额都多好多, 同埋你可以买失业保障类既保险, 详情太复杂, 有兴趣再私下问我.

本地生活
即系衣食住行玩啦.

先讲玩

柏斯系完全无野玩既.

衣

一般真系必须既野都可以系bigw 等买到, 上文有提. 到底平到点呢? 例如一件正正常常既长袖棉质衫, 系bigw $4可以买到, 牛仔裤$9可以买到,前排减价我$7买左. 你上www.bigw.com.au可以睇到有咩买同有咩减价.

点解大家都系亚洲人, 有的人一睇落去就知你系第度来定系本地大呢, 衣着系一个重点, 你系街会如果见到亚洲人, 会见到好多波点, 豹纹, 乎卢骨, 萤光大红大紫黑底金边, 真系polo牌既polo恤, 好靓料既羽绒褛, 好贵既手袋同好贵既波鞋. 呢的都系亚洲人好兴既, 本地亚洲人唔会着因为一般本地人去既地方无呢的野卖.

点解有的亚洲人一睇就似本地大既呢? 因为有卖呢的款既地方唔系大型连锁商场, 所以一般本地人好少去既, 平时系香港要去zara或者marks and spencer先买到既款, 其实系呢度系一般商场既target 或bigw等就买到, 香港人买zara因为的款够正常似正常西方人, 呢度人买包括我自己买呢的款其实就只系因为渠超平而我个人超孤寒.

初时来未搵到工果阵会成日都去city, 不过讲真都无咩行, myer同david jones的野贵到痴线. 买只白色玻璃碟都可以成千蚊, 系一只喎.而家好少行, 因为要返工而且唔顺路, 而且无咩野要特别出去买, 好多华人开既饰物铺其实都系卖埋的旺角野, 但好贵.

而且我未见过呢度有LV店, 好似行过见过一间Gucci唔知有无记错, nike店要出到去harbour town先有(by the way你可以试下去搵工), 一般香港人好中意既牌子呢度系大连锁商场都系无既, 全部都要出city先有, 而本地人又好少特别出city买野既, 因为难泊车又贵, 而且唔需要特别去搵的所谓既名牌, 本地人买野系中意亲自去摸下个质料既, 唔会因为你印多左个logo而俾多200倍去买同一个手袋, 呢度的人买野一系睇质料一系就买最cheap果只, 唔兴追名牌的, 你亦唔需要带agnes b, 呢度无人知系咩来.

本地男人系唔中意shopping的.

对话小贴示:

你买野去俾钱的时候, 个收银员会问你一堆野, 通常系问你俾cash or card, 如果你已经刷左张卡, 渠多数系问你crecit, check 定系savings. 如果你张唔系credit卡, 咁就通常都系check或者savings.

呢个会好常见, 写出黎你有个准备, 唔驶连咁简单的野都"下"来"下"去啦 .


食

平食

听闻呢度餐厅贵过东岸好多, 我未去过东岸, 但呢度一般餐厅系贵, 高级餐厅反而唔太贵, 食个麦当劳餐一般都系7-8蚊, 但近来多左好多麦当奴同hungry jacks等做$2 special, $2有个包, 好似$1.5 有细薯条麦乐鸡同软雪糕, 对比番呢度人搵既薪金来讲其实呢度麦当奴平过香港.

hungry jacks 即系全球所有地方包括香港既burger king. 起初因为版权问题, 原本就有间卖汉堡的叫burger king, 所以迟来的burger king就要改名做hungry jacks 喇. whopper应该即系香港既华堡. 唔记得, 好耐无食过香港的, 香港的burger king系好食的, 几年前食系好食, 呢度的burger king系唔好食的. 千祈唔好有任何期望.

唯一系呢度既薯条系比香港好食, 因为呢度的人食薯条食到我地香港人食饭咁, 一般我食hungry jacks都会叫果个人即炸薯条俾我, 真系新鲜既薯条系好好食的, 先趁热食左的真系热同真系脆既薯条先, 先再食个包. 当然啦, 我次次都会叫渠俾新炸薯条我, 但渠都唔系次次俾我啦, 都会好似香港咁, 未死就当系新鲜咁俾你, 有次仲有个员工系后面大嗌话"全部野都咁新鲜架啦!" 然后当然到手包薯条系只系微暖. 算啦, 无吐啖都算好彩.

fish and chips 食过咁多间都无乜特别, 讲真, 我觉得咁多油炸出来既鱼唔会有鲜味, 而渠本身都唔系鲜鱼系雪鱼, 我食过最好食既fish and chips系系湾仔而家fat angelos果个位, 已经执左, 唔系净系我, 好多朋友不约而同讲番都有相同评价.

呢度的人好中意食nandos, 我有香港的空姐朋友都好中意食. 我自己就一般, 你中意可以去试下. menu可以上www.nandos.com.au睇到.

food court 各大商场都有好多food court, 当中一定有香港菜, 好地道的, 因为多数都系香港人主理, 质素就一般都系hea既, 唔好太高期望. 但好多都系俾大中小钱, 然后有个大中小碟, 你可以行一圈去任意装满渠. 而我呢的人又好中意用的鸡翼既之类去围大个碟然后再放多的野既.. .

food court好多香港菜铺头临收铺都会平卖饭盒, 你可以买来第日食. 一般来讲你食唔晒既野都可以放冰箱, 食晒再叮番, 即系急冻一样系冰箱你放几耐都得. 就算pizza/ kfc等食唔晒都可以雪落冰箱, 你放焗炉叮就会脆的. 面包都可以放冰箱.

车仔面- 据我所知, 呢度成个省都唔存在车仔面的, 请你系香港食埋先来. 未试过既话去湾仔同金钟交界间车仔面之家, 好好食的, 尤其当你食过hea的车仔面, 你就会明白唔hea既车仔面可以有几唔hea, 佢唔会俾的比毒药更无色无味既汤你叫做汤底, 唔会求其搵果的细粒装唔弹牙又唔入味既鱼蛋你叫佢做鱼蛋, 汤底浓味, 而且渠系有自制辣酱, 牛腩, 冬菇同鸡翼, 都系系hea车仔面当食唔到的.

渠系后巷的, 请自己搵open rice, 平时夜晚六七点过后唔开, 太迟去都会卖晒冬菇牛腩等好味野, 星期日都唔开.

唔平食

sizzlers 你可以点个牛扒或者烧猪筋骨, 然后​​以前系任食任添的沙律甜品而家听讲变左你可以行一个圈. 咁就唔系好抵了, 亦无左自助餐果种乐趣,不过食物质素是可以接受的.

hog's breath 如果你真系中意食牛扒, 建议去呢间, 牛扒大件好多, 比起上一间呢间抵好多, 个扒三十几左右, 加野饮应该四十几. 如果你要食就拣渠的12定唔知24小时slow cook既扒, slow cook即系类似炆, 好林的, 但如果你星期六日去最好卜定位, 而且迟去既话渠的slow cook扒会卖晒的.

hipo creek 都系食扒的, 质素很好, 唔平.

sawanee (咁上下) 你去google 或者urban spoon search "the best thai in perth" 就系果间, 其他的小型take away店, 泰菜味道都好西化, 得呢间系真系好食. 系正式泰菜类.

你想食特别的泰菜可以去red opium, 里面好黑的, 营造出一个好似烟雾离曼好似俾人吸毒咁既环境, 好食, 系fusion 式泰菜. 里面好嘈, 好似酒吧咁, 而且附近真系有好多酒吧.

dragon palace 龙门大酒楼, 可以去饮茶, 食物可以, 价钱正常. 流沙奶皇包

香港顺德烧味, 超好食, 坚, 好食过香港好多茶餐厅同烧味铺, 唔系净系我讲, 岩岩系香港来既朋友都系咁讲. 推介要食烧鸭同烧肉.

hyatt 如果你中意食酒店自助餐, hyatt唔贵, 上次去好似系四十几五十蚊左右, 我上次去有红酒试饮, 应该系星期六日先有, 而星期一至四系平$10的,但上次朋友就系闲日去话无得试酒. 唔会有香港咁多花款, 但你可以去食海鲜, 海鲜平时好多地方都无得食, 有得食都唔系真系鲜,或者离奇咁贵.

hillarys海边有间叫jetty's咁上下既野话食海鲜, 上果你上urbanspoon (类似香港的openrice) 会见到好评劣评系50%-50%, 对我来讲系一间好评度极度低既餐厅(正常来讲一间餐厅好评度应该系维持系80%), 基本上唔会去试. 想来食海鲜既朋友建议你其实不如去hyatt, 而​​且星期六日去虽然无得平$10但应该较多野食. 同香港一样太少人既时段自助餐都唔会有太多选择.



hillarys有间卖chocolate的店里面的macaron系好食的, 系外脆内软韧, 据我推断唔系渠地自己整的, 系入口, 但系可以试的, 加多杯薄荷茶就无咁"漏"了. 果间野系有卖条状扭花donut条的, 配朱古力酱点来食, 好好食的但一个人食太漏了. 就算最细的份(好似系三条donut条) 都系两个人share好, 尤其饭后. 间野叫chocolateria系海边, pizza店隔离果间, 呢度好多coffee shop都有macaron卖, 但本地人惯左叫macaroon, 而一般coffee shop的macaroon都唔系专业师父整, 试过几间都唔好食的, 都系成件硬晒.

donut條">呢度 --> donut条


大家有咩好推介不妨提出.



住、行

我系到步之前系已经上网搵左地方住, 系www.gumtree.com搵, 你​​拣番perth或者你自己所属地区先慢慢睇, 你可以跟自己预算搵, 一般$100-$200. 我当时搵到既系唔驶钱的, 条件系要帮手打扫间屋, 当然其实只系一星期三几个钟, 其余时间你可以照常返放工.

另外亦有朋友搵到免费住宿的, 主要条件都系你系佢唔系屋企既时候帮渠睇住小朋友, 照顾老人家之类. 其实唔难搵的, 据我所知一般香港人或者华人既分租房就好少会有呢的免费机会既, 而且会超多人迫埋一间屋. 而且如果间屋本身无一的家俬电器既话你都要自己买, 因为大家都系住一阵走,好少会买好多野系度.

由于当时搵到既呢个免费住宿系由一个本地鬼妹提供既, 而渠又系一个好中意周围玩周围识朋友既人, 所以渠都成日带我去唔同朋友度玩, 识多好多朋友之余, 你会好快就学到本地人做咩工, 点搵工, 而且有咩系渠地唔做既.

另外除左租金都睇下你住个地方方唔方便, 尤其如果你唔渣车, 就算你睇地图上近city, 都要睇下其实渠易唔易出街, 因为有的地方系地图上睇渣车3分钟就到, 行路其实要半个钟, 如果无公共交通都好唔方便, 注意有好多地区巴士都系成个钟先有一班, 所以plan好时间先出门口, 否则你会等成日个钟都未有车.

请善用google maps, 好多朋友唔知, 其实呢度既google maps系有详尽既巴士路线同时间表, 手机版都系一样, 你输入你要去既目的地既正确位置(即系连埋街号), 输入你出发个位置, 拣公共交通(渠预设路线系驾车路线), 渠就会列出你搭几号巴士, 站号系几多(栋系地下个条绿色棍) 同埋几点出发, 你由屋企行几耐到车站, 架车几点开出(早几分钟, 有时会早, 但一般来讲系超准时, 尤其系唔会塞车既地区), 然后转地铁搭边条线去边个方向等... 如果(通常)你要再转巴士果架巴士系几点(因为有时地铁同巴士班次接得唔好你要等好耐), 系非常仔细而且好update下的. 因为我仲未有车牌所以公共交通系我主脚而且常用google maps.

小贴士:

查google maps时留意站牌号码, 因为有时同一个位有对面两边线系去两个唔同方向的, 但认站牌号码就唔会认错因为每个站牌号都唔一样的. 呢种情况尤其常见系shopping center, 公园等.

见工或者重要事请预多少少时间!

买张smart rider系比每次买车飞既车费平的, 如果你登记埋自动增值, 个车费就会平25%. 但你唔可以拣concession除非你有本地学生证而且要特别申请一张concession卡, 当你无卡系身既时候去买单程票都唔可以用concession, 捉到会罚钱的.

一般来讲, 唔建议入黑之后仲系街度行, 尤其如果你唔系系正city正中间, 一般条街都唔会有人的, 着深色衫裤小心车行过都睇你唔到.


虽然呢度无咩好玩, 但呢度一般人中意睇既电视剧可以推介下, 可能你会更快习​​惯听英文, 亦都同本地人多个话题.
喜剧类

two and a half men - 讲一个单亲爸带住个本来七岁左右既小朋友, 因为离婚到去渠哥度寄住, 呢个爸系半个医生来既, 但无人当渠系医生, 渠哥系个唔驶做野但都劲有钱既作曲家, 一日到黑都系饮酒沟女既, 一个好辛苦做野但离婚分左半份身家无埋间屋既爸同个好好彩唔驶做又有钱既哥加埋个细路当然有笑料, 电视唔2边个channel有做但系做到season 唔知9定几, 由season 1 开始睇个小朋友系7-8岁, 系最近season渠已经系成年既靓仔(无错套野拍左十年都有), 但个烂饮主角因为真人都变成咁既关系已经换左角色, 已经唔好睇, 你无野做、等食饭可以睇下. 而家系season break, 但你可以上网睇.

the big bang theory - 超好笑, 又系最好由season 1开始睇, 讲一班毒男遇到隔离屋岩岩新搬来左个靓女, 毒男其实全部都系系大学做研究的博士来的, 得一个系颉士所以渠又成日俾人笑, 但成班都好叻的, 个靓女系几靓既但超极肤浅, 夹埋好搞笑. 而家又系season break, 由头开始几个season我翻睇左几次, 返到香港又同屋企人睇, 仲系好好笑. 新season无咁好笑, 1-2-3最好.

family guy 讽刺时弊既卡通片, 唔系俾小朋友睇的.

认真剧

前排睇完fringe, 好似明珠台曾经有得睇, 好似叫F档案, 系科幻故事.

有套好复杂既叫damages, 系由一个杀人案开始逐格讲番转头, 一个新律师同一个老律师, 杀人同阴谋同法律之间既野, 超好睇, 认真剧, 第一个season最紧张, 基本上你睇第一集就会停唔到要睇晒成个season.

而家睇紧套the good wife, 律师剧, 都系法庭舌剑唇枪画面, 几好睇.

非剧集

如果你中意睇的野唔驶追, 睇又得唔睇又得, 又唔太无聊, 可以睇mythbuster, 渠系属于discovery channel既一个系列, 但唔系好闷果的好正式果种, 比较似真人show果种节奏, 渠系会用一的科学既方法去试下究竟一的坊间既传言系唔系真, 例如厕所用抹手纸系唔系比用风机干净等, 渠地会做唔同既setup然后会去测下每边有几多个细菌, 有时荷里活电影会有人系酒店跳落泳池逃走, 或者用冰造子弹等子弹穿入身体之后无晒证据, 或者系用血滴子采你个头等, 渠地又会测试下究竟系有无可能.

听朝返工, 谂到再讲.